المقال التاني الذي أرسلك إليه كاتب ذلك المقال عن قراءة الأخبار كاملةً وعدم الاكتفاء بالعناوين

شو بتعمل هون؟ بعثك علي مدحت صح؟ الله لا يسامحك ولا يسامحه. الواحد بطَّل يعرف يقعد برواق ويشرب قهوته من ورا أشكالك اللي أي رابط بشوفوه بروحوا كابسينه. ما في حرية اختيار ولا إلك رأي ولا انتقاء للمحتوى اللي بتعرض دماغك إله؟

أنا طبعاً مش رح أضيِّع وقتي معك وأرتب أموري وأكتب بالفصحة زي ما مدحت بيعمل. بدي أحط أخطاء إملاءية كمان، حر أنا. خد هاي كمان: مقالُن. مبسوط على حالك هيك؟

بس جد كيف ممكن نخلص منك؟ بدك معلومات؟ ما عندي. خلص روح روِّح على بيتكم عمو، في فيروس خطير وممكن تنعدي، يلا شطور، شوفلك لعبة ولا فيلم يلمُّوك.

هفففففففت. شكلك عنيد ومش رح تروح إلا إذا أخذت معلومات. اتفضل سيدي، هي معلومات:

الدب القطبي أعسر
بعكس باقي أعضاء جسمك، أنفك وأذنيك ما بوقفوا نمو
معدل استهلاك الفرد الآيسلندي للكوكاكولا هو الأعلى في العالم
يومياً، مصانع مونوبولي بتطبع أوراق عملاتها أكتر من ما الخزينة الأمريكية بتطبع دولارات

أنا مش عارف طبعاً إذا المعلومات هاي صح ولا لأ، بس مين سائل أساساً؟ يعني أكيد مش إنت لأنك ما بتفوت على مقال تقرأه إلا إذا كان العنوان جذاب، بدك الكتاب يضحكوا عليك ويجرُّوك لمواقعهم زي الولاد الصغار. أشك إنه بدك معلومات أساساً.
إذا مصر برضه على هبلك وحابب تقضي يومك تقرأ أخبار ومقالات، اتفضل هون شوف كيف حضرتك السبب بإنه وصلنا لهاي المرحلة.